Posted on by admin

«Դաս՝ Երեւան-Նախիջեւան-Բաքու ճանապարհը գովերգող ՀՀ իշխանություններին»

«Aravot» -ի զրուցակիցն է Հայաստանի մտավոր սեփականության պաշտպանության ֆեդերացիայի նախագահ Գագիկ Մանասյանը:

– Պարոն Մանասյան, օրերս Վրաստանի Մառնեուլի շրջանում խոչընդոտվել է հայկական բեռների մուտքը Հայաստան: Ինչպե՞ս կմեկնաբանեք սա. արդյո՞ք վերադառնում են 90-ականները՝ հայտնի իրադարձություններով: Ի դեպ, տարեվերջին Հայաստանի մտավոր սեփականության պաշտպանության ֆեդերացիայի նախաձեռնությամբ վրաց գործընկերների հետ հայ եւ վրաց ժողովուրդների բարեկամության եւ համագործակցության համաձայնագիր ստորագրվեց։ Ինչպե՞ս կմեկնաբանեք այս երեւույթը։
– Մինչ մամուլում այս տեղեկատվության հրապարակումը, մեր վրացի գործընկերները մեզ տեղեկացրին եղելության իրական փաստերի մասին։ Մեր ասոցիացիայի հոգաբարձուների խորհրդի անդամ Արբակ Խաչատրյանը հեռախոսազրույց է ունեցել Մառնեուլի շրջանի նախկին պրեֆեկտի հետ։ Ի դեպ, վերջինս 90-ականներին վճռորոշ դեր է ունեցել հայ-վրացական պատերազմը կանխելու եւ Արբակ Խաչատրյանին օգնել է Հայաստան ցորեն ներկրող ավտոշարասյան անվտանգության հարցում։ Պարզվում է՝ Մառնեուլում ապրող ադրբեջանցիները ճանապարհի եզրին գտնվող ռեստորանից դուրս են եկել փողոց ոգելիչ խմիչքի ազդեցության տակ՝ նկատելով հայկական ավտոշարասյունը, քարեր են նետել ավտոշարասյան ուղղությամբ եւ վիրավորանքներ արձակել հայ վարորդների նկատմամբ։ Այս առիթով ձերբակալվել է 10-ից ավելի մարդ։ Կատարված քննության արդյունքում պարզվել է, որ իրական մեղավորները հովիվներ են եղել, որոնք այժմ թաքնված են սարերում։ Իրավապահ մարմինները ներկա պահին իրականացնում են համապատասխան գործողություններ՝ հովիվներին հայտնաբերելու համար։ Սա վերջին դասն է Հայաստանի ներկայիս իշխանություններին, որոնք օրնիբուն քարոզում են Երեւան-Նախիջեւան-Բաքու նոր շահագործվող ճանապարհի անվտանգության մասին։ Եթե Վրաստանի Մառնեուլի շրջանում ապրող թուրքերը մեկ այլ հանրապետության տարածքում համարձակվում են կատարել նմանատիպ արարքներ, ենթադրաբար իրենց երկրի ներսում նրանք առավել սանձարձակ կգտնվեն։
– Կատարվածին պետական մակարդակով արձագանքներ, կարծես, չկան: Իսկ հանրային եւ հասարակական մակարդակում փորձեր արվելո՞ւ են հարեւան պետության հետ խնդիրները կարգավորելու համար:
Նելլի ԳՐԻԳՈՐՅԱՆ
«Առավոտ» օրաթերթ